Iĝu gastiganto de Pasporta Servo nun! publikigita je : 18-a de marto 2026
Hej, samideano! Ĉu vi…
- havas liberan ĉambron aŭ liton en via hejmo;
- volas helpi samideanojn, kiuj vizitas vian urbon; aŭ
- …simple volas trinki bieron aŭ kafon kaj pasigi bonan tagon kun aliaj homoj tra la tuta mondo?
Iĝu gastiganto en la tutmonda reto de Pasporta Servo! Ni serĉas homojn tra la tuta mondo, kiuj lastatempe (aŭ ne) lernis Esperanton kaj nun deziras aparteni al tiu ĉi kreskanta reto de gastigemaj homoj en pli ol 120 landoj!
Kio estas Pasporta Servo?
Pasporta Servo (PS) estas adresaro de homoj el la tuta mondo, kiuj senpage akceptas gastojn en siaj hejmoj. Ekde 1974, ĝi faciligas la starigon de kontaktoj trans limoj de lingvoj, kulturoj kaj generacioj, kaj estas unu el la plej gravaj kaj popularaj servoj de TEJO. Nuntempe en la servo estas registritaj pli ol 2400 gastigantoj el 121 landoj kaj ofertantaj gastigon en 1801 diversaj urboj.
Imagu: Vi estas vojaĝanta en alia lando sed vi volas ŝpari kostojn en hoteloj. Samtempe, vi ankaŭ ŝatus enprofundiĝi en la loka kulturo kaj renkontiĝi kun novaj homoj. Kial ne serĉi lokan esperantiston kaj gasti dum unu aŭ pluraj tagoj en ties hejmo, tute senpage?
Pasporta Servo konstruas inter ĉiuj esperantistoj la sentojn de komunumo, reciproka fido, kaj malfermiteco, ke vi, esperantisto, estas bonvena al la hejmoj de aliaj homoj nur pro la fakto, ke vi parolas la internacian lingvon!
Spektu ĉi tiun novan filmeton en Jutubo por scii pli.
Kion mi bezonas fari por iĝi gastiganto en Pasporta Servo?
Uzado de Pasporta Servo estas tute senpaga kaj ankaŭ tre facila kaj por gastigantoj, kaj por gastoj! Ĉar ĝi estas servo por esperantistoj, minimume necesas scipovi Esperanton (se vi komprenas ĉi tiun frazon, vi jam plenumis unu postulon) kaj krome aĝi almenaŭ 16 jarojn.
Por iĝi gastiganto, simple iru al http://pasportaservo.org kaj alklaku la butonon “Registriĝi” por krei konton. Poste, kompletigu vian profilon aldonante viajn priskribon, loĝadreson, telefonnumeron kaj publikan retadreson. Certigu, ke la datumoj pri vi estas kompletaj kaj ĝustaj. Ne zorgu, ĉar via kompleta informo ne videblas al ĉiuj sen via eksplicita konsento.
Por konekti vin kun viaj idealaj gastoj, vi ankaŭ povas fiksi certajn kondiĉojn pri gastigado (ekz. “Ne fumu”, “Hejmbestoj estas bonvenaj”, “Mi bezonas 30-tagan antaŭsciigon”, ktp.)
Por iĝi uzanto (sen esti gastiganto), vi simple povas krei vian konton sen aldoni loĝejon.
Mi ne havas liberan dormspacon por aliaj esperantistoj en mia hejmo. Ĉu mi ankoraŭ povas iĝi gastiganto?
Jes, senprobleme! Estas pluraj manieroj iĝi gastiganto: ekzemple, vi ankaŭ povas, laŭ via plaĉo:
- bonvenigi gaston al via hejmo por manĝi pladojn kuiritajn de vi (aŭ rigardi vian riĉan kolekton da Esperanto-libroj);
- ĉiceroni gaston tra via urbo por vidi la plej belajn kulturajn kaj historiajn trezorojn (aŭ aliri al sekretaj lokoj ekster la turismaj zonoj); aŭ
- renkontiĝi kun gasto ĉe loka kafejo, restoracio aŭ trinkejo por komforte konatiĝi kaj ekzerciĝi pri Esperanto-parolado.
Estas multaj ebloj! Vi povas indiki ĉion tion en via profilo kiel gastiganto! Ne forgesu indiki vian urbon, por ke homoj povu facile trovi vin.
Kiel mi povas aliri la PS-adresaron?
Pasporta Servo aperas kiel reta adresaro (alirebla nur al registritaj kaj ensalutintaj uzantoj). Simple uzu la serĉilon aŭ rigardu la tutmondan mapon por trovi gastigantojn en la urbo aŭ lando, al kiu vi deziras vojaĝi.
Krome, TEJO ankaŭ planas, kun la subteno de Universala Esperanto-Asocio (UEA), eldoni paperan libreton en 2026. La libreton vi povos mendi poste en la jaro (ni anoncos kiam ĝi estos havebla), kaj ĝin vi povos facile porti ien ajn dum via vojaĝo por kontaktiĝi kun aliaj esperantistoj, eĉ kiam vi ne havas retkonekton! (La lasta papera eldono de PS aperis en 2017.)
Se vi volas aperi en la libreto kiel gastiganto, aliĝu prefere ĝis la 12-a de aprilo 2026! Aŭ, se vi jam estas ekzistanta gastiganto, nepre aktualigu viajn datumojn por aperi en la libreto.
Se vi havas demandojn pri Pasporta Servo, kontaktu nin ĉe saluton@pasportaservo.org.